MOTORPSYCHO
'The Gaia II Space Corps'
Diskoetxea: Det Nordenfjeldske Grammofonselskab.
Norvegiako taldeak, sortu eta lau hamarkadara, zutik eta tinko jarraitzen du bere rock progresibo-psikodelikoa lantzen. Oraingoan, ordea, eta bere ezaugarriei muzin egin gabe, inoiz baino gehiago hurbildu da 70eko urteetako hard-rockera. Halaxe nabaritzen da lehen bi kantuetan: Fanny Again, Or oinarrizko heavy-hard estiloa lantzen duen harribitxi bat da, eta The Great Stash Robbery, berriz, astuna eta gitarreroa. Kantu oso bizarroak datoz gero, Motorpsychoren jarraitzaileek biziki eskertuko dituztenak: TSMcR psych-folk oso berezia da, eta The Hornet bereziki hipnotiko eta psikodelikoa. The Gaia II Space Corps, berriz, arraroa, berezia eta saturatua da, eta The Oracle tonu grabean eraikitako folk-metal psikodelikoa. Amaitzeko, The Frost taldearen Black As Night-en bertsio azkarragoa eta saturatuagoa dator, bukaera aldeko eztanda gogorra ahantzi gabe. Bide propioa lantzen jarraitzen dute, inori baimenik eskatu gabe eta beti beste pauso bat emateko intentzio garbiarekin.
