Errenteriako (Gipuzkoa) Atlantikaldia kultur topagune eta musika jaialdiak aurtengo gonbidatuen lehen zerrenda eman du. Besteak beste, Pambele (Kolonbia), Muchachito Bombo Infierno (Katalunia), Aita Mon Amour (Maroko), Kumpania Algazarra (Portugal) eta Ramon Mirabet (Katalunia) arituko dira, irailaren 18tik 21era. Euskal Herriko artistarik ere izango da tartean; esate baterako, Kiliki, eta Eider eta Anixe.
Palestinako Sol Band taldeak, bestalde, Olatz Salvador, Eñaut Elorrieta, Ines Osinaga eta Arkaitz Miner musikariekin osatuko du lehenengo Itsas Elkarrizketa, jatorri ugaritako sortzaileak harremanetan jartzea helburu duen ekinaldia.
Zeharkaldiak izango du leloa aurtengo Atlantikaldiak, eta Errenteriako alkate Aizpea Otaegik eman du horren azalpena: «Zeharkaldiak ez dira soilik fisikoak. Kultura, esperientzia eta sentipenen arteko gurutzaketak ere badira, nork bere mugak zabaltzeko gonbita. Hori da Atlantikaldiaren espiritua». Migrazio historikoei eta gaur egungoei egindako keinu bat ere badela gaineratu du: «Artearen eta musikaren bidez, omenaldia egin nahi diegu gure komunitatea beren hizkuntzarekin, kontakizunekin eta tradizioekin aberastu duten guztiei».
Hizkuntza ugari eta askotariko ikuspegi artistikoak agindu ditu Atlantikaldiak hamabigarren aldi honetarako, baita genero berdintasunerako konpromisoa eta nazioarteko eta tokiko sorkuntza uztartzeko gogoa ere. «Horixe da gure zeharkaldia», esan du Otaegik.
Aurreko urteetako toki eta gune tematikoak izango ditu aurten ere Atlantikaldiak: Itsasargi Nagusiak Agirre Lehendakariaren plazan izango du eszenatokia; Herriko Plazak emanaldi intimoagoak hartuko ditu, izen bereko tokian; Kalekaiak, arte urbanoaren guneak, Panier orubea izango du egoitza; eta Herrixkak Foru plazan hartuko du tokia. Azken horretan, parte hartze kolektiboko jarduerak bilduko dituzte, eta gastronomiarako gunea ere bertan izango da.
