Loturak, ikuslearen esku

Alain Urrutiaren (Bilbo, 1981) formatu handiko hainbat ikatz marrazkik osatzen duten sekuentzia ikusteko aukera dago egunotan Bilboko Guggenheim museoko aretoko horma batean, II. kapitulua; Distopia izenburua duen erakusketan. Paper gainean eginak dira Urrutiaren ikatz marrazkiok, eta irudi lausotuekin osatuak. Aldez aurretik, itxuraz behintzat, elkarrekin inolako loturarik ez dutela diruditen eguneroko egoerak islatzen dituzte; ikusleari dagokio sekuentziako irudien eta haien arteko loturen interpretazioa egitea; baita ere, hortik abiatuta, egilearen iruditeriari buruzko bere kontzepzioa lantzea.

Guggenheim Horma lehiaketa

Euskal Herriko artista gazteentzat antolatutako Guggenheim Horma lehiaketan hautatutako bost egitasmoetako bat da Urrutiaren II. Kapitulua; Distopia. Gainerako proiektu hautatuak Eduardo Hurtadok, Alvaro Gilek, Zuhar Iruretagoienak eta Irantzu Sanzok eta Cristian Villavicenciok eginak dira. Museoko 103B aretoko 20,6 x 5,9 metroko horma batean erakusteko egindako lanak dira denak.

Eduardo Hurtado, Alvaro Gil eta Zuhar Iruretagoienaren lanak ikusi ahal zan dira orain artean horma horretan, eta orain Urrutiarenak hartu die lekukoa, azaroaren 11 bitarte. Urrutiaren lanaren ondoren, Irantzu Sanzok eta Cristian Villavicenciok egindakoa baino ez da faltako ikusteko.

Guztira, 75 egitasmo aurkeztu ziren Guggenheim Horma lehiaketara.