Arabako Bertsolari Txapelketako lehen faseko azken saioa jokatu dute gaur arratsaldean, Izarrako kultur etxean. Asier Otamendi, Danel Herrarte, Eli Zaldua, Maddi Agirre, Rikardo Gonzalez de Durana eta Xabi Igoa aritu dira kantuan, eta Agirrek bildu du puntu gehien: 251 puntu denera. Irabazlearen puntu kopuru bera eskuratuta, bigarren sailkatu da Otamendi, eta haren atzetik Igoa (249), Herrarte (239,5), Gonzalez de Durana (229,5) eta Zaldua (225).
Horrenbestez, argituta geratu da finalerdietan kantatuko duten hamabi bertsolarien zerrenda. Lehen hiru saioak irabazita, Agirrek, Aroa Arrizubietak eta Peru Abarrategik lortu dute finalerdietarako txartela; eta puntuazioaren arabera sailkatu dira, berriz, Martin Abarrategi, Otamendi, Igoa, Iñaki Viñaspre, Sabin Abarrategi, Ekaitz Samaniego, Herrarte, Unai Anda eta Andere Arriolabengoa.
Martxoaren 7an izango da lehen finalaurrekoa, Dulantzin, eta martxoaren 14an bigarrena, Aramaion. Bi saio horietan erabakiko da zein bertsolarik kantatuko duten Gasteizen martxoaren 28an jokatuko den finalean.
