Lizarrako (Nafarroa) Los Llanos parkean joko du abuztuaren 10ean Manu Chaok (Paris, 1961). Herriko festetan izango da orduan Lizarra, eta kontzertua doakoa izango da.
Orain dela bi urte, 2014ko uztailean, jo zuen azkenekoz Manu Chaok Euskal Herrian. Donostiako Piratek antolatutako Edozer dugu posible egunari amaiera emateko kontzertua eman zuen milaka lagunen aurrean Zurriolako hondartzan. Urte bereko azaroan Bilbon izan zen Mano Negrako kide izandakoa. Orduan, ordea, Fermin Muguruzaren, Jorge Aldereteren eta Harkaitz Canoren Black is beltzanobela grafikoaren inguruan antolatutako jardunaldietan izan zen hizlari.
