Persepolis albumaren sortzaile izateagatik egin zen ezagun Marjane Satrapi irudigile eta zinemagilea (Raxt, Iran, 1969 - Paris, 2026). Oihartzun handia izan zuen zuri-beltzeko irudiz osatutako komiki autobiografiko hark, eta, hainbat hizkuntzara itzuli ez ezik, zinemarako ere egokitu zuten lana. Satrapi gaur hil da, 56 urte zituela, Frantzian, haren gertukoek jakinarazi dutenez.
2000. urtean hasi zen Satrapi Persepolis idazten, eta lan erreferentzialtzat daukate askok. Irango iraultza islamikoa du hizpide, eta lehen pertsonan kontatu zuen, bere begietatik, gazte zela horixe bera bizi izan baitzuen. Artistaren lan ezaguna hainbat hizkuntzatara itzuli dute; besteak beste, euskarara. Irene Arrarats BERRIAko euskara taldeko arduradunak euskaratu zuen lana, eta duela bi urte kaleratu zuten liburua Elkar eta Reservoir Books argitaletxeek. Arraratsek orduan adierazi zuen «orri bakoitzean perlak» dituela liburuak, eta narratzeko modua goraipatu zion Satrapiri: «Xalo eta tolesik gabe kontatzen ditu gauzak. Bere burua biluzten du, ez du edertzen, ez du idealizatzen, eta begiak zabalik begiratzen du kanpora ere».
irakurri gehiago
2007an, zinemara eraman zuen lana Satrapik, animaziozko film bat eginda; Vincent Paronnaudekin batera zuzendu zuen lana, eta epaimahaiaren aitortza jaso zuen Cannesko zinema jaialdian, baita Oscar sarietarako izendapena ere lortu ere.
Familia burges progresista batean jaio zen Satrapi, eta 10 urte zituela piztu zen iraultza herrialde hartan, baita handik gutxira Iranen eta Iraken arteko gerraren lehen txinpartak ere. Hortaz, alaba babeste aldera, gurasoek Vienara bidali zuten, 14 urte besterik ez zuela. Handik Teheranera itzuli zen, Arte Ederrak ikastera, baina segituan mugitu zen Frantziara; bertan egin ditu hil arteko urte guztiak.
Zinemagilea, margolaria eta komikigilea izan zen, eta giza eskubideen aldeko borrokan ahots garrantzitsuenetako bat ere izan zen harena.
