40 Minutu Rock musika jaialdirako material elektrikoa lapurtu dietela salatu dute festibal horren antolatzaileek. Sare sozialen bitartez eman dute lapurretaren berri, eta jakinarazi dute 10.000 euro baino gehiagoko gastua eragin diela. Gertatutakoa salatzeko, elkarretaratzea egingo dute bihar, Durangoko (Bizkaia) Landako gunean, 19:30ean.
Otsailaren 15ean izan zen 40 Minutu Rock jaialdiaren aurtengo edizioa, eta, urtero bezala, euskal preso, iheslari eta deportatuak laguntzeko bideratu behar zituzten irabaziak. Lapurretak, baina, laguntza ekonomiko hori baldintzatu dezakeela ohartarazi udte.
Elkartasun ekitaldi askok erabaki dute amatizea —besteak beste, Lasterbidean, Zama Doinuz Arindu eta Hatortxu Rock—, baina 40 Minutu Rockeko antolatzaileek uste dute halako proiektuak oraindik ere beharrezkoak direla. Presoen «etxeratze prozesuak duintzea» da antolatzaileen helburu nagusia.
