Muskildin (Zuberoa) egin dute Xilabako bigarren faseko azken aurreko saioa, Posonpesenea aretoan. Miren Artetxe izan da garaile, 425,5 puntu lortuta. Haren ondoren joan dira Elixabet Etxandi (397,5 puntu), Haira Aizpurua (393 puntu), Mizel Mateo (380 puntu), Oier Urreizti (364 puntu) eta Bittor Thikoipe (359,5). Xabi Elgart izan da saioko gai jartzailea. Gaurko saioa irabazita, Artetxe urtarrilaren 10ean egingo den finalaurrekorako sailkatu da zuzenean.
Bigarren faseko azken saioa Hiriburun (Lapurdi) izango datorren igandean, hilak 21. Bertan arituko dira Aitor Servier, Irantzu Idoate, Joanes Etxebarria, Johaine Serraillet, Nahia Sasco eta Ramuntxo Christy. Antton Lannesek egingo ditu gai jartzaile lanak.
Gabonetan geldialdia egingo du txapelketak, eta urtarrilaren 10ean hasiko da berriro; finalaurrekoekin. Baigorrin (Nafarroa Beherea) izango da lehena, eta bigarrena, berriz, Bardozen (Lapurdi) urtarrilaren 17an. Finalaurrekotako saioetako bakoitzean arituko diren bertsolarien behin betiko zerrenda jakiteko datorren astera arte itxaron beharko da.
