Jendez bete da goizean Itsasuko (Lapurdi) Sanoki gela, aurtengo Gazte Xilabako finalean. Goizane Etxeberri, Amaiur Aizpuru, Unax Aizpurua, Nahia Etxeberri, Leina Alkhat eta Gana Berhokoirigoin aritu dira kantuan, Elixabet Etxandik emandako gaien gainean.
Ramuntxo Christy, Zuhaitz Olazabal, Maindi Murua eta Ainhoa Sarasua epaileek hartu dute azken deliberoa, eta epaiak argi utzi du lehia estua izan dela, berdinketa gertatu baita. Azkenean, Nahia Etxeberri Lopepe ainhiztarra izendatu dute txapeldun, eta Aritz Bidegain Bertsularien Lagunak elkarteko lehendakariak jantzi dio txapela. Ideia originalena izan duen bertsolariaren saria, berriz, Unax Aizpuruak eskuratu du, Marikarmen Albizuren eskutik.
Hala, erabakita gelditu da zer bertsolarik hartuko duten parte Euskal Herriko Eskolarteko Bertsolari Txapelketako finalean. Nahia Etxeberri, Unax Aizpurua, Goizane Etxeberri, Amaiur Aizpuru eta Leina Alkhat ariko dira kantuan, Arabako, Bizkaiko, Gipuzkoako eta Nafarroako gainerako finalistekin batera. Ekainaren 14an izango da saio hori, Arantzako frontoian (Nafarroa), 11:30ean.
