Pio Caro Baroja dokumentalistaren lanari aitortza egingo dio Ikuspuntu jaialdiak

ZINEMA. Iazko azaroan zendu zen Pio Caro Baroja etnografo eta dokumentalista omenduko du Nafarroako Zinema Dokumentaleko X. Ikuspuntu jaialdiak. Juan Antonio Urbeltzen aurkezpen batez lagunduta, gogora ekarriko dute Navarra Cuatro Estaciones haren obra, bertan agertzen diren protagonisten testigantzekin. Solasaldia osatzeko, haren Udazkena eta Negua piezak eskainiko dituzte, baita Oskar Alegriak Berako Itzea etxean egin zion elkarrizketa proiektatu ere. Heldu den asteartean izango da saioa, Baluarten, 20:00etan.