Jon Maiak jarraipena eman dio Kantu bat gara disko-liburuari, eta beste lan bat ondu: Kantu berri bat gara diskoa. Hainbat kolaboratzailek parte hartu dute, eta tartean da Silvio Rodriguez kantautore kubatarra; euskaraz kantatu du Nostalgia izeneko abestian –Gorka Hermosaren doinuekin egina da kantu hori–. Rodriguez sona handiko musikaria da nazioartean, eta hainbat emanaldi eginak ditu Euskal Herrian ere.
Beste hainbat kolaboratzailek ere hartu dute parte lanean: besteak beste, Itziar Ituñok, Olaia Inziartek, Mikel Kazalisek, Maddalen Arzallusek eta Ibrahima Baldek. Hilaren 8an aurkeztuko dute diskoa, Bilboko kafe Antzokian. Elkar argitaletxeak kaleratu du.
