'Lina plastilina'
Idazlea:Izaro Arroita. Ilustratzailea: Josevisky. Argitaletxea: Elkar.
Liburu honetan murgiltzen bazara, prest egon behar duzu fantasia dosi handi xamarra onartzeko, liburuak hainbat lizentzia —oso zilegi direnak— hartzen baititu espazioari eta materiari dagokienez.
Liburua bi partetan banatuta dago, abentura banarekin, segidako kronologian.
Lehen partean, protagonistaren eraldaketa aurkezten zaigu aurrenik —superheroi baten jaiotza dena—, eta segidan, abentura dator. Bigarrengoan, amaiera irekia duen beste abentura bat.
Forma eta estetika oso zinematografikoak dauzka narrazioak, gaztetxoen telesail baten modukoa, sitcom horietako batena. Era berean, superheroiaren ezaugarriak esku artean dugun liburu fisikoarekin lotuta daudenez, irudigintza ezinbesteko osagaia da. Uztarketa agerikoa da paperaren, letren eta irudien artean, eta, batzuetan, hirurak narraziorako osagai bihurtuta agertzen dira.
Ilustraziogintzak komiki erako lanketa erakusten du, marrazki-film baten fotogramak balira bezala. Narrazioari tonu mina jartzen diote, karrankaria ere bai hainbatetan, testuan dagoen gozo ukituekin kontrajartzen. Nire ustez, obra borobiltzeko oso lagungarria.
