Jarraitzeko asmoz egin zuten antolatzaileek Aiara Fest jaialdiaren lehendabiziko aldia, aurtengo maiatzean, eta lortu dute: bigarren aldia prest daukate jada. 2026ko maiatzaren 29an eta 30ean egingo dute, Amurrioko Refor gunean (Araba), eta Su Ta Gar, La Pegatina, Dubioza Kolektiv eta Biznaga izango dira kartelburuak. Antolatzaileek nabarmendu dutenez, belaunaldi eta musika ikuspegi ezberdinak ordezkatzen dituzte lau talde horiek, baina badute ezaugarri komunik: zuzeneko indartsuak eskaintzen dituzte, eta «kutsu sozial zein emozional handiko» taldeak dira.
Talde horiekin batera, egitarau «zabal eta eklektikoa» ondu dute jaialdiaren bigarren aldirako, rocka, punka, indiea, joera urbanoak eta «sustraietako» soinuak uztartuz. Kartelburuekin batera, talde hauek ere ariko dira: Sune, Sanguijuelas del Guadiana, Janus Lester, Javi Medina, Merina Gris, Mirua, Sobrezero, El Jose, Niña Coyote eta Chico Tornado, Sr. Lobezno eta Gwa Ya.
Jaialdirako sarrerak bihar 12:00etan jarriko dituzte salgai jaialdiaren webgunean. Antolatzaileek adierazi dute «naturaz inguraturiko kalitatezko musika esperientzia» bat izan nahi duela jaialdiak, lehen mailako kartela eta ingurune berezi bat uztartuta, eta sorrerako filosofiari eutsiko diola, «gertutasuna, gozamena eta lekuarekiko errespetua» lehenetsita. Hala, pilaketarik gabeko eta ondo zaindutako giroa izango dela ziurtatu dute.
