'Uhin galduak'

Funkak ere badauka bere lekua Euskal Herrian, galde diezaietela bestela Diabolo Kiwi taldekoei eta beraien jarraitzaileei, bigarren diskoa atera berritan lehengo zaleak ez ezik berriak ere bereganatu eta kritika ezinhobeak jaso baitituzte. Ez da gutxiagorako, dantzarako doinuz, umorez eta ironiaz, bi pertsonaiaren arteko bidaia intergalaktiko bat proposatzen baitigute, ongi landutako abestiekin, doinu alaiak eta kritika hitzak —beti ere umorea alde batera utzi gabe— plazaratuz. Aurreko lanaren bide beretik jarraitu dute, baina disko sendo eta osoago bat lortuz, dagoeneko gure herriko panoraman euren lekua eginez. Jantzi dezagun astronauta kaskoa, presta gaitezen play eman eta dantzan espaziora eramango gaituen lanerako.