Urruzunotarrak Gehituz antolatu dute, Urruzuno sarien ordezko gisa

Krisi ekonomikoaren eta aurrekontuen doikuntzaren ondorioz aurten Urruzuno lehiaketarik ez antolatzea erabaki duela jakinarazi zuen urtarrilean Eusko Jaurlaritzako Hezkuntza, Unibertsitate eta Ikerketa Sailak, baina Urruzunotarrak Gehituz ekinaldian parte hartzeko deia egin die orain Bigarren Hezkuntzako ikasleei. Martxoaren 30era arte zabalik dute epea beren idazlanekin parte hartzeko —poesia nahiz prosa,baita bertso paperak ere—, eta epaimahaiak aukeratutako hogei lanen egileek aukera izango dute lau eguneko prestatze egonaldi batean elkartzeko. Egonaldi horretan, literatur tailerra egin eta idaztearekin zerikusia duten beste hainbat arlo landuko dituzte, idazle batekin zuzeneko harremanetan. Horretaz gain, Euskal Idazleen Elkartearekin elkarlanean, idazle gazte sarituei aurrerabiderako literatura tutoretzako bideak jartzea ere aztertuko da. Lan sarituak argitara emango dituzte, Sagastiberri sailean.