Donostiako Zinemaldiak mundu osoko zinema ikasleen film laburrak zabaltzen ditu Nest sailean, eta aurten hamalau lan lehiatuko dira Nest The Mediapro Studio saria lortzeko. Inoiz baino ekoizpen gehiago aurkeztu dira oraingo honetan: 473 proposamen, denera 57 herrialdetako 220 ikastetxetatik bidaliak. Parte hartzaileen artean, besteak beste, Indiako, Malaysiako, Suediako eta Suitzako zinemagileak daude; eta, generoei erreparatuz, animazioa, ez-fikzioa eta drama dira aipagarrienak.
Duela 24 urte antolatu zen aurrenekoz Nest saila, eta, harrezkeroztik, mila zinemagilek baino gehiagok parte hartu dute. Zinemaldiko antolatzaileek azaldu dutenaren arabera, etorkizuneko zinemarako «leihoa» eta kontatzeko beste modu batzuk bateratzeko «topagunea» da Nest saila. Aurtengo saria irabazteko lehiatuko diren hamalau zinemagileek «hurbileko eta urruneko kezkak eta errealitateak» irudikatu dituzte beren lanetan: amatasuna, zainketak, osasun mentala eta nork bere nortasuna bilatzea, besteak beste.
«Oihana eta ni»
«Zer gertatuko ote da oihana eta ni neu hiltzen garenean?». Hori galdegin dio bere buruari Lucilak, 80 urteko sendalari indigena brasildar batek, irratia piztu eta etxe aurrean duen oihana ikusi duenean. Basoa sutan dago, eta protagonistak ez daki zer egin. Istorio hori du ardatz Benjamin Hindrichs zuzendari alemaniarraren Passed/Mother lanak; Nest saria irabazteko hamalau hautagaietako bat da.
Lau Charles mexikarrak, berriz, familia baten gorabeherak izango ditu jomugan Casa chica film laburrean. Hartan, Valentina eta Quique neba-arrebek aitaren beste familia ezagutuko dute, eta aitaren beste alabak Valentinaren adin bera duela deskubritu.
Aipatutakoez gainera, beste film labur hauek aukeratu dituzte Nest sailean aritzeko: Ines Nunesen The Loneliness of Lizards, Eva Sajanovaren How to Listen to Fountains, Marina Xarriren Habitat Hotel, Jules Vesigot-Wahlen The Land of Slumber, Moana Sonen My Mother Sleeps, Megane Bruggerren Mom Dances, Hui Yin Kooren Daughter, Marlon Weberren Only Making Out, Lenia Friedrichen Life Is Like That and Not Otherwise, Aleksander Beloven That Summer I Got Accepted to University, Milan Kumarren The Old Bull Knows, or Once Knew eta Arthur Gayen When the Geese Flew.
