BIME jaialdia Bilbon antolatzen den musikari profesionalen arteko topaketa da, eta aurtengoa hamaseigarren aldia izango du. BIME Pro urriaren 28tik 30era egingo da, Euskalduna jauregian, eta, horren barruan, musikaren industriaren inguruko elkarrizketak, tailerrak eta mahai inguruak egingo dituzte, hainbat abeslarirekin; tartean Leire Martinez, Mon Laferte eta Ruben Blades. Egun bakoitza amaitzean, gainera, artista bakoitzak kontzertu bat emango du. Bestalde, BIME Live ekimenaren barruan, hirurogei artista baino gehiagoren emanaldiak antolatu dituzte Bilboko hainbat aretotan; irailaren 9an argitaratuko dute zeintzuk igoko diren oholtza gainera. Sarrerak salgai daude jada jaialdiaren webgunean.
Jaialdiaren antolatzaileek azaldu dutenaren arabera, aurtengo BIME Proren agenda inoiz baino «zabalagoa», «espezializatuagoa» eta «nazioartekoagoa» izango da. Artistek askotariko gaiak jorratuko dituzte: Leire Martinezek bilakaerari eta identitate artistikoari buruz hitz egingo du; Ruben Bladesek, berriz, artistek izaten dituzten aldaketen inguruan, eta Mau y Ricky bikoteko kideek azalduko dute bikote gisa abestea nolakoa den. Aipatutako abeslariez gain, musikari hauek ere egongo dira: Valeria Castro, Mon Laferte, Zahara eta Alcala Norte, besteak beste.
BIME Live ekinaldia, berriz, Kafe Antzokian, BBK Salan, eta Crystal, Stage Live, Dock, Bilborock, La Ribera, Muelle eta Cotton Club aretoetan izango da. Hirurogei artista baino gehiago izango dira horietan, eta kartelaren lehen aurrerapena irailaren 9an plazaratuko da.
BIME Pro eta Live antolatzeaz gain, jaialdiak barne hartuko ditu beste hainbat proiektu. Esaterako, musikari hasiberrientzako eta jakintzak eguneratu nahi dituzten profesionalentzako topagune bat sortu dute, belaunaldien arteko loturarik «sortzeko» xedearekin. Besteak beste, inpaktua duten proiektuak aurkezteko gakoak landuko dituzte, eta Latinoamerikako merkatuan artista anglo-saxoiak ezagutarazteko estrategiak irakatsi. BIME Startup egitasmoaren bitartez, berriz, musikaren industrian «inpaktua» duten proiektu berritzaileak bultzatuko dituzte. Aurkeztutako lan berri horien artean, Impacto saria banatuko dute.
