Arabako Foru Aldundiak neurriak areagotuko ditu ezpeletako sitsa heda ez dadin

EH Bilduk zenbait prebentzio neurri eskatzeko mozioa erregistratu zuen uztailean. EAJ eta PSE-EErekin batera erdibideko mozio bat adostu dute orain, arazoari aurre egiteko. Espezie inbaditzailea da ezpeletako sitsa.

Ezpeletako sitsa, artxiboko irudi batean. Didier Descouens
Ezpeletako sitsa, artxiboko irudi batean. DIDIER DESCOUENS
Aratz Aranburu
2026ko urriaren 26a
13:26
Entzun 00:00:00 00:00:00

Arabako Foru Aldundiak urtea amaitu baino lehen gauzatuko du ezpeletako sitsak lurraldean duen eraginari buruzko azterketa sakona. Halaber, izurriaren hedapena «zorrotzago kontrolatzeko» konpromisoa hartu du, betiere biodibertsitatearen kontserbazioarekin guztiz bateragarriak diren tresna eta baliabide tekniko egokien bidez. Neurriak gaur berretsi dituzte Arabako Batzar Nagusietako Nekazaritza Batzordean, EH Bilduk eta EAJ eta PSE-EEren koalizio gobernuak lortutako akordio bati esker. Alderdi Popularrak eta Elkarrekin Ahal Dugu-k ere babestu dute neurria.

Adostutako testuan, aldundiari eskatu diote «zehatz-mehatz» azter dezala nola banatuta dagoen gaur egun ezpeletako sitsa, zer kalte eragin dituen, eta zer arrisku dagoen eremu gehiagotara zabaltzeko. Horrekin batera, atzemate goiztiarreko sistemekin jarraitzeko eskatu diote aldundiari, egoeraren bilakaerari buruzko informazioa «etengabe» eguneratuz eta kontrol neurri «eraginkorrak» abian jarriz.

Bestalde, Arabako Batzar Nagusiek aldundiari eskatu diote egindako eta aurreikusitako jarduerak «modu koordinatuan» lantzea gainerako administrazio eskudunekin eta jabeekin. Etorkizunean prebentzioa eta kudeaketa bateratua bermatuko dituen «jarduera protokolo zehatz bat» garatzeko eskatu dute Batzar Nagusiek.

Erantzun azkarraren beharra

EH Bilduk ohartarazi du Cydalima perspectalis, Asiako ezpeletako sitsa, espezie inbaditzaile arriskutsua dela: «Sitsak ezpelen hostoez elikatzen dira; hala, landareak pixkanaka ahultzen dituzte, eta, batzuetan, zuhaixken eremu zabalak desagerrarazi ere bai». Endika Saez de Adana EH Bilduko batzarkideak azaldu duenez, 2025ean Lagranen eta Bernedon (Araba) detektatu zen izurria, eta uste dute Arabako beste eremu batzuetara hedatuko dela neurririk azkar hartzen ez bada.

Saez de Adanak azpimarratu du ezinbestekoa dela mehatxua behar bezala «ebaluatzea eta kudeatzea». Halaber, udalaz gaindiko arazo bat denez, administrazioak elkarrekin koordinatzeko eskatu du, baita atzemate goiztiarreko eta jarraipeneko sistemak martxan jartzeko ere: «Ezin dugu itxaron kalteak zabaldu arte. Kontrol neurriak egoki aztertu behar dira, gure natur ondarea babestu, eta administrazioek modu koordinatuan jarduten dutela bermatu».

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA