Agurain (Araba) inguruko lautadak ez dira etorkizun hurbilean eguzki plakaz estalita esnatuko. Cañaveras Solar enpresak atzera egin du udalerri horretan eta Iruraz-Gaunan ia 50.000 eguzki plaka izatekoak ziren bi zentral fotovoltaiko eraikitzeko asmoan. Enpresaren arabera, Eusko Jaurlaritzak egitasmoei egindako ingurumen-inpaktu txostenetan eskaturiko moldaketek «bideraezin» bilakatu lituzkete bi eguzki parke horiek.
FV Ubalza eta Ubalza II zuten izena parkeek, eta 30,9 megawatteko potentzia izatekoak ziren. Enpresak 2023an eskatu zuen aurretiazko administrazio baimena, eta Eusko Jaurlaritzak 2025ean egin zuen ingurumen inpaktuaren txostena. Egitasmoen iragarpenak zalaparta eragin zuen eskualdean: Aguraingo Udala, EH Bilduk kontrolatua, eguzki parkeen aurka agertu zen, argudiatuta ez zutela lurraldera onurarik ekarriko eta nekazaritza lur estrategikoak hartuko zituztela.
Hainbat aldaketa egiteko eskatu zuen udalak. Jaurlaritzaren ingurumen-inpaktu txostenak ere hainbat moldaketa eskatu zituen: tartean, zentralen azalera eta, ondorioz, potentzia ere murriztea. Enpresaren ustez, murrizketa horien ostean «teknikoki eta ekonomikoki bideraezinak» lirateke egitasmoak. Hortaz, bertan behera uzteko eskatu dio Eusko Jaurlaritzari, eta EAEko gobernuak gaurko aldizkari ofizialean argitaratu du erabakia.
