Savanna Power Solar 14 enpresak 2024an jarri zituen martxan Arabako lurraldean parke eolikoak eraikitzeko bi proiektu. Horietako bat, Cluster Vitoria 30kV izenekoa, bertan behera geratu dela jakinarazi du gaur Arabako Mendiak Aske elkarte ekologistak. Enpresa bultzatzaileak berak iragarri dio Eusko Jaurlaritzari proiektua bertan behera utziko duela, baina, elkarte ekologistaren esanetan, atzera egite horren arrazoia zera da: proiektuaren ingurumen inpaktuari buruzko txostena kontrakoa dela.
Orain bertan behera geratu den Cluster Vitoria 30kV proiektuan 112 metroko sei aerosorgailu jartzea aurreikusten zuten, Arabako Dulantzi, Iruraiz-Gauna, Donemiliaga, Barrundia, Burgelu, Arratzua-Ubarrundia eta Gasteizko udal mugarteetan. 37 milioi euroko aurrekontua zuten proiekturako, eta hasieratik eskualdeko erakunde ekologisten eta tokiko biztanleen arbuioa jaso zuen, ingurumenean eta lehen sektorearen bizimoduan izango zuen inpaktua dela eta.
Arabako Mendiak Aske elkarteak parke eolikoaren aurkako alegazioak aurkezteko kanpaina bultzatu zuen, eta gaur begi onez ikusi dute bertan behera geratu izana. Hala ere, gogorarazi dute energia berriztagarrien beste ehun proiektu daudela abian oraindik, eta horiek ere «mehatxua» direla lurralderako. Hortaz, antzeko proiektuen aurka borrokan jarraituko dutela iragarri dute.
