Duela urte gutxi bi mende bete ziren Gasteiz inguruko lurretako gudurik sonatuena izan zela: Wellingtonen agindupeko tropa ingeles, espainiar eta portugaldarrek Napoleonen soldadu frantsesak garaitu zituzten Arabako hiriburuaren mendebaldean, eta Frantziako enperadore loriatsuak zaldi gainean ekin behar izan zion ihesari, Pirinioetara bidean. Orain, bisitariek eta bertakoek bizikletan bisitatu ahalko dituzte gudu famatu hartako lekurik garrantzitsuenak, erakundeek 1813. Gasteizko gudua 84 kilometroko ibilbide zikloturistikoa ondu baitute elkarlanean, izen bereko guduaren historia ezagutzeko modua ematen duena.
Iruña Okan (Araba) egindako ekitaldi batean aurkeztu dute ekitaldia, gaur. Bertan izan dira Javier Hurtado Eusko Jaurlaritzako Turismo sailburua eta Arabako Foru Aldundiko eta Iruña Okako Udaleko agintariak. Ibilbidea Gasteizko Armagintza museoan hasten da, Ajuriaenearen ondoan, eta, hortik abiatuta, «borrokak gertatu ziren leku nagusietako batzuk» zeharkatzen ditu, «hala nola mendebaldeko lautada, Zadorra ibaiaren ingurua, Tresponde eta Argomaiz».
Hurtado sailburuaren hitzetan, ibilbide berriak «memoria historikoa, paisaia eta turismoa» uztartzen ditu, eta landa eremua ere kontuan hartuko duen «turismo eredu berri eta jasangarriago» baten adibidetzat ezarri du egitasmoa. Estrategia horren bidez, «turismo fluxuek urtaroen araberakoak izateari uztea eta mugitzen laguntzea» du helburu Jaurlaritzak, baita bisitariak hain ezagunak ez diren tokietara joatera ere.
