Martxoan iragarritakoa orain bete du Arabako Foru Aldundiak. Orduko hartan, Ramiro Gonzalez ahaldun nagusiak Batzar Nagusietan iragarri zuen aldundiak bulego fisiko batean zentralizatuko zituela etxebizitzaren arloko foru laguntza eta baliabide guztiak. Baliabide horiei buruzko informazioa ematea du helburu bulegoak, eta gaur ireki dute, Gasteizko Landazuri kalean.
Bulegoan, Arabako Garapen Agentziako teknikariek emango dute arreta, eta astelehenetik ostiralera egongo da zabalik, goizeko bederatzietatik ordu bietara. Bulego berrian, herritarrek «alokairuaren, etxebizitza erostearen, erreformen edo alokairu kontratuen» inguruko zalantzak argitu ahalko dituzte, aldundiaren arabera. Aldundiak etxebizitzaren arloan dituen programak Etxebizitza.araba.eus orrialdean ere kontsulta daitezke.
