Labrazako kontzejua, Araba Bizirik, Arabako Mendiak Aske eta Arabako Errioxa Bizirik taldea batu egin dira larunbatean, Labrazan (Araba) egin asmo duten zentral eolikoaren aurka azaltzeko. Salatu dute proiektuak ondorio«itzulezinak» izango lituzkeela, bai lurraldean eta baita inguruko animaliengan ere, eta bertan behera uzteko eskatu diote Oiongo Udalari.
Proiektua zalantzan jarri duten bi helegite prozesuan daude oraindik, aldez aurreko administrazio baimenari eta plan bereziari eragiten diotenak, eta eskatu dute jarduera oro bertan behera utz dezala udalak, «epaitegiek esan beharrekoa entzun arte».
