Martxoaren 3ko Biktimen Elkarteak unitate didaktiko berritu bat aurkeztu du gaur Gasteizen, 2014an sortutako materiala eguneratu eta osatzeko helburuarekin. Borinquen Martinez Telleria eta Miren Rodrigo Argote bigarren hezkuntzako irakasleek garatu dute proiektua, Irale programaren bidez. Derrigorrezko Bigarren Hezkuntzako 4. mailako ikasleentzat pentsatua dago, Komunitaterako Proiektuak ikasgairako bereziki. Unitate didaktiko berriak, gainera, mailen arteko lankidetza bultzatzen du: 4. mailako ikasleek euren ikerketen emaitzak 2. mailakoen aurrean aurkeztu ahal izango dituzte.
Berrikuntzaren ideia iaz sortu zen Ekialdea BHI institutuan, eta aurten webgune baten bidez jarri da eskura, paperezko materialak ordezkatuta. Plataforma digitalean askotariko materialak daude, besteak beste, komikiak; galdetegiak; Vitoria, 3 de marzo filma; aurkezpenak eta azalpen teorikoak. Material berria egiteko, aurreko urteetako edukiak berrerabili dituzte, eta Xabier Sagastaren komiki irudiekin osatu dute.
Rodrigok azaldu duenez, «Gasteizen, 1976ko martxoaren 3an gertatutakoa ikasleekin lantzea da helburu nagusia, giza eskubideen urraketatik abiatuta». Beraz, proiektuak belaunaldien arteko transmisioa du ardatz, eta ikasleen ikerketa lanen bidez sortutako testigantza bildumak ezagutaraziko dira, memoria historikoa eta sentsibilizazioa sustatzeko.
Elkarteak beharrezkotzat jo ditu halako lanak, sarraskia ezagutarazten eta Gasteizen gertatutakoaz kontzientzia pizten laguntzen dutelako. Amaiur Arbe Arrieta elkarteko kideak material horien garrantzia nabarmendu du: «Elkartearen funtsezko ardatzetako bat da belaunaldi gazteenei azaltzea zer gertatu zen 1976ko martxoaren 3an. Bisitei eta halako baliabideei esker, memoria bizirik mantentzea lortu dugu».
