Garrak piztu ziren atzo Gardelegiko zabortegian (Araba). Gasteizko udal zabortegia da hori, eta ez da han sua piztu den lehenengo aldia. Aurtengo ekainean ere, sute bat piztu zen han, eta lau langile ospitalera eraman behar izan zituzten. Oraingoa, Gasteizko Udalaren arabera, ez da «arriskutsua» herritarrentzat, eta perimetroa ezarri diote jada, baina «zaila» da garrak itzaltzea, erraz erretzen diren hondakin organikoak biltegiratzen ziren gune batean piztu baita sua.
Ikusi gehiago
Suhiltzaileek gau osoa eman dute «ura botatzen», baina sutea «oso iraunkorra» da, eta oraindik ez dute lortu itzaltzea. Udalak jakinarazi du posible dela hirian «erre usaina» nabaritzea tarteka, baina gaineratu du kea ez dela ez toxikoa eta ez arriskutsua, eta herritarrei «lasaitasuna» helarazi die. Suteak ohiko arazoa dira Gardelegin, eta sindikatuek hainbatetan salatu dute langileek ez dutela halakoei aurre egiteko nahikoa baliabiderik.
