Jose Angel Iribar eta Athleticen zuzendaritzako hainbat kide Gernika-Lumoko batzar etxean izan dira goizean. Izan ere, Ana Otadui Bizkaiko Batzar Nagusietako presidenteak Gernikako arbolaren enbaxadore izendatu du futbol kluba, eta arbolaren kimu bat eman dio. Athleticek Txekiako hiriburuan landatuko du azaroaren 25ean, Slavia Praga taldearen aurka Txapeldunen Ligako partida jokatzera doanean.
Otaduiren esanetan, Gernikako arbola «askatasunaren, autogobernuaren, errespetuaren eta bakearekiko konpromisoaren sinboloa da». Athleticek dituen balioak ere azpimarratu ditu Batzar Nagusietako presidenteak: «Inklusioa, nortasun kulturala eta herri harrotasuna gorpuzten ditu». Horregatik, uste du erakunde egokia dela enbaxadore izateko. «Gogora datorkigu gure sustraiek indartsu egiten gaituztela, eta batera ditugun balioek bildu egiten gaituztela». Otaiduren esanetan, egitasmo horrekin hainbat printzipio zabaldu gura dituzte Europara: «elkartasuna, errespetua, talde lana, gure nortasunarekiko fideltasuna eta gero eta hobeak izateko grina».
Klubaren izenean, Nerea Ortiz presidenteordeak esan du «harrotasunez» hartu dutela izendapena. Gogoratu du Athleticek Follow Something Unique iniziatiba sortu zuenean helburu izan zutela talde zuri-gorriaren balioak Txapeldunen Ligako aurkarien hirietara eroatea. Gernikako arbolaren kimua Europara eroatea Athleticen «balioak landatzeko modu bat» dela esan du Ortizek.
