Hiru hamarkada ospatu zituen iaz Bilboko metroak, eta markak hautsita egin zuen. Batez beste, 321.526 bidaia egin ziren lanegunetan, aurreko urtean baino 11.534 gehiago. Urte gehienetan, bidaia gehieneko eguna abenduaren 21a izan da, San Tomas azoka dela eta. Iaz, ostera, abenduaren 10a izan zen: Athleticen eta PSGren arteko partida jokatu zen, eta 380.041 txartel balioztatu ziren. Guztira, 104.508.201 bidaia egin ziren urte osoan, 30 urteotako kopururik handiena da.
Metroa lanegunetan erabiltzen dutenen artean, aldaketa igarri dute metroko arduradunek. Ikusi dute gutxitu egin direla metroa astelehenetik barikura egunero hartzen dutenak; ostera, ugaritu egin dira astean hiruzpalau aldiz hartzen dutenak. Uste dute telelanaren ondorio dela.
Urte gorabeheratsua ere izan da metroarentzat. Hainbat matxura izan zituen iaz, eta nabarmen eragin zioten zerbitzuari. Larriena urriaren 6koa izan zen: zerbitzuak arazoak izan zituen goizean eta arratsaldean, eta milaka erabiltzaile metroa hartu ezinik geratu ziren. Hala ere, hori ez da nabaritu bidaiariek zerbitzuari buruz duten iritzian, Bilboko Metroak egindako inkestaren arabera. Batez beste, 8ko nota ipini diote.
Erabiltzaileek ondoen baloratu dutena Barik txartela izan da: 8,6 nota ipini diote. Paretsu estimatu dute zerbitzuaren azkartasuna ere (8,5). Geltokien garbitasunak, trenen puntualtasunak eta euskararen erabilerak ere zortzitik gorako nota jaso dute.
Animaliez ere galdetu dute inkestan. Egunero erabiltzen dutenen %27k esan dute zortzi kilotik gorako txakurrak baimenduko balira gutxiago bidaiatuko luketela edo metroa hartzeari utziko lioketela. Hamar lagunetik zazpik uste du txakur handiek eragina izan dezaketela bidaiariengan eta azpiegituren egoeran.
