Dagoeneko 45 urte igaro dira Pablo Picassoren Gernika koadroa New Yorketik Madrilera eroan zutenetik. Jose Maria Gorroño Gernika-Lumoko (Bizkaia) alkatearen ustez, «bada garaia» margolana izena ematen dion herrian egoteko. Azken egunetan, koadroa Bilbora eroateko eskatu du Eusko Jaurlaritzak, eta, horren harira, Gorroñok esan du Gernikan egon beharko lukeela.
Gaur 87 urte bete dira tropa frankistek 36ko gerra irabazi zutenetik. Garaipenaren egun legez ospatu izan zuen Francisco Francoren erregimenak, eta, efemeridea aprobetxatuta, Gernikako alkateak «bakearen aldeko mezua» plazaratu gura izan du. Horretarako, Gerrarik ez dioen pankarta bat ipini du udaletxeko balkoian.
Gorroñoren esanetan, Gernika «bake eta adiskidetze herria» da. «Indarkeria gaitzesten dugula adierazi nahi dugu, biktimen aldeko kontzientzia sortu, eta balio demokratikoak defendatu». Gainera, alkateak gatazka armatuen ondorioez ohartarazi du, bereziki Ekialde Hurbileko egoera gogoan hartuta: «Gerrek desoreka globala sortzen dute, eta horrek gosea, pobrezia, erbestea eta heriotza dakartza munduko leku askotan». Era berean, azpimarratu du Gernikak «bakearen, adiskidetzearen eta giza eskubideen aldeko oihua» zabaldu gura duela.
Apirilaren 26an 89 urte beteko dira Alemaniako gerra hegazkinek Gernika bonbardatu zutenetik. Eraso hartan 1.600 lagun baino gehiago hil zituzten, eta herriaren %85 baino gehiago suntsitu. Efemeridea gogoan hartuta, Gernika-Lumoko Udalak eskultura bat inauguratuko du apirilaren 26an, San Juan Ibarra plazan: Bakerako atea. Corten altzairuz eginda egongo da, eta hormetan «Memoria Demokratikoaren Lekua» edukiko du idatzita. «Herri honek jasan zuen iragana ez ahaztea da kontua, eta, horretaz gain, bakerako begirada izatea», adierazi du Gorroñok.
Pieza berria Nestor Basterretxearen Suak eragindako agonia eskulturatik hurbil egongo da; hain zuzen, 1937ko erasoan lehen bonba erori zen inguruan.
