Gatikako ibai eta erreketara eta Jatabeko akuiferoetara egin ziren lehen isuriak. Oraingoan, Mungiako Atxuri errekan agertu da bentonita, udalak salatu duenez. Bizkaia eta Frantzia lotuko dituen interkonexio elektrikoaren obretan erabiltzen du Red Electricak bentonita. Udalak argitu du ez dela toxikoa, baina Gatikako isurketak salatu zituzten boluntarioek ohartarazi zuten ingurumenean kalteak eragiten dituela.
Mungiako Udalak esan du Uraren Euskal Agentziarekin eta Bizkaiko Foru Aldundiarekin batera ibili dela egoera aztertzeko lanak egiten, nahiz eta ez den udalaren eskumeneko auzia. Isuriari eusteko neurriak martxan jarri dituztela ere azaldu du. Prebentzio neurri modura, inguruan obrak eteteko agindu dute, eta enpresari eskatu diote berehala garbitu dezala kaltetutako ibai zatia. Ura agentziak zigor txostena ireki dio Red Electricari.
Interkonexioaren argindar kablea hodi handi batzuen barrutik joango da, lur azpian eta itsasoan. Zulaketa gidatua delako teknikarekin egiten dituzte hobiak lurperatzeko zuloak. Horretarako, bentonita erabiltzen dute. Buztin industriala da. Urarekin kontaktua duenean, geruza iragazgaitz bat sortzen du, erreka hondoan pilatzen da, eta inguruko bioaniztasunari kalte egiten dio. Lurrarekin nahastea ere arriskutsua izan daiteke.
