Jesarlekuak leihoen kontra ipinita, bagoietan leku gehiago egongo da: 80-100 bidaiari gehiago sartuko dira tren bakoitzean. Behar denean, minutu eta erdian behin ibiliko dira; gaur egun, hori da tren batetik besterako denbora tarterik txikiena. Ondorioz, bidaiariei dagokienez, marka hausten jarraitu ahal izango du Bilboko metrokoak. Bizkaiko Garraio Partzuergoko Kontseilu Nagusiak zerbitzua berritzeko proiektua koordinatzeko eta integratzeko laguntza teknikoa kontratatzea onartu du gaur, eta, bide batez, etorkizuneko metroaren zertzelada batzuk ere eman ditu. Tren zaharrenak kendu —37 guztira—, eta berriak ipiniko dituzte. Berriek beste bagoi bat izango dute, bosgarrena, eta, hala, edukiera %12 handituko da. Era berean, seinaleztapen sistema modernizatuko dute. Aginte mahai zentralizatua ere eguneratuko dute.
Ikusi gehiago
Tren berriak energetikoki eraginkorragoak izango dira, material nagusia aluminioa izango delako: pisuari dagokionez, arinagoak izango dira, eta, ondorioz, energia kontsumoa ere %20 inguru txikituko da. Isilagoak ere izango dira, %15 eta %20 artean. Teknologia digitala ezarriko diete, mantentze lanak optimizatzeko eta erabiltzaileei informazioa zuzenean emateko. Esaterako, trenak zenbateraino dauden beteta jakin ahal izango dute bidaiariek. Horrez gain, ate zabalagoak izango dituzte, 1,60 metrokoak, irisgarriagoak izateko. Horri esker, trenera sartzea eta irtetea %25 arinduko da.
Elixabete Etxanobe Bizkaiko ahaldun nagusi eta garraio partzuergoko presidenteak esan duenez, ezaugarri tekniko berri horiek zehaztu ondoren, lehiaketa publikorako pleguak prestatzen hasiko dira. Haren esanetan, egingo duten inbertsioari esker «zerbitzu fidagarriagoa eta hobea» emateko aukera izango du metroak. Eusko Jaurlaritzak eta diputazioak 743 milioi euro ipiniko dituzte. Ez dute zehaztu aldaketak noizko egongo diren prest, baina gutxienez bost urte pasatuko direla aurreikusi dute.
