Luz Estella Romero abokatu ekofeministak (Baranoa, Kolonbia, 1977) jakin-mina izan du bere ibilbide profesionalean eta aktibismoan tresna nagusi. Asocolemad kolektiboarekin batera, gatazka armatuaren eta interes ekonomikoen ondorioz bortxaz lekualdatu dituzten kolonbiarren eskubideak defendatzen ditu, besteak beste. Transnazionalek emakume kolonbiarrengan duten eraginaz arituko da bihar eta ostegunean, Errenteriako Torrekuan eta Andoaingo Urigainen. 19:00etan izango dira bi hitzaldiak.
Orain sei hilabete, BERRIAn egindako elkarrizketa batean azaldu zuen indarkeria ekonomikoa indarkeria matxista dela. Hain zuzen ere, Romerok gertutik bizi du egoera hori, estatuaren erasoen ondorioz erbesteratu beharra izan baitzuen 2021ean, eta Bilbon bizi da ordutik.
