Liburu kolektibo bat. Ibilbide bat duten egileen zein hasiberriak diren idazleen poemen topaleku bat. Argitalpen berezia da Hatsaren Poesia bilduma, eta sortu zen lekuan bertan, hots, Senperen aurkeztuko dute bildumako zenbaki berria, igandean. 28.a izango da aurtengoa, eta Senpereko Ur-Hegia etxean egingo duten aurkezpenaren bidez jendarteratuko dute.
Egun osoko egitaraua prestatu dute horretarako: 11:00etan jarri dute hitzordua, 11:30ean aurekztuko dute liburua, eta aperitifa eskainiko dute ondotik. Antolatzaileen esanetan, norberak antolatuko du bazkaria gero, eta arratsaldean errezitala egingo dute; libururako poema bat idatzi dutenek aukera izango dute nork bere poema irakurtzeko. Egitaraua ixteko, Gorka Zabaletaren kantaldia izango da.
Ikusi gehiago
«Poesiaz, elkartzeaz eta komunitateaz» gozatzeko eguna izango dela nabarmendu dute antolatzaileek, eta hara biltzeko gonbidapena egin diote interesa duen orori. Hastapenetatik, elkargune izaera hori izan da Hatsaren Poesia bildumaren ezaugarri nagusia, bai liburuarena —ehun poeta baino gehiagoren testuak bildu ohi dituzte— eta bai haren bueltan antolatu izan dituzten ekitaldiena. «Askotariko sormen ahotsen elkargune izaten jarraitzen du liburuak», azpimarratu dute, «poesia espazio ireki eta partekatu gisa ulertuta».
1999. urteaz geroztik da abian egitasmoa, Auxtin Zamorak Senpereko Hatsa elkartearen bidez sortu zuenetik.
