Palestinako herriak pairatzen duen genozidioa gaitzetsi dute Makean, eta elkartasun mugimenduek munduan zehar jasaten duten errepresioa salatu dute.
Dozenaka herritar elkartu dira Lapurdi barnealdeko herri horretan antolatu duten elkartasun egunean. Iparraldea Palestinarekin taldeak egun osoko egitaraua prestatua zuen bertan, hainbat hitzaldi eta tailerrekin.
«Palestinar banderak debekatu, isunak mobilizatzen direnei, atxiloketak, Poliziaren jazarpenak, segipenak, kontrolak... Aski argi gelditzen da ez dutela nahi Palestinaren aldeko elkartasunik, ez dutela entzun nahi horren aldeko ahotsik», adierazi zuten antolatzaileek egunaren aurretik.
Hala, elkartasuna adierazi diote Omar Alsoumiri, joan den astean Frantziako Poliziak atxilotu zuen militanteari. Hura kide den taldea, Urgence Palestine, presente izan da Makean antolatu duten egunean.
