Azaroko hego-haize bolada luze eta epela amaitzeaz bat, 2025eko Euskadiko XContest parapente txapelketako sari banaketa egin zuen Euskadiko Aire Kirol Federazioak igandean. Eta, horretarako, leku berezia aukeratu zuen: Orioko lurreratze eremu berria, Oria ibaiaren eta kirol portuaren ondoan dagoena.
2025eko parapente denboraldi osoan egindako hegaldien aitortza egiten da sari banaketa horretan. Zehazki, parte hartzaile bakoitzak urte osoan egindako sei hegaldi luzeenak hartzen dira kontuan XContest lehiaketa horretan. Baldintza nagusi bat dago: sei hegaldi horietatik lautan, gutxienez, Gipuzkoa, Bizkaia, Araba eta Nafarroatik aireratu behar dute parapentelariek, eta lurralde bakoitzeko hegaldi onena hartzen da aintzat; gainerako biak lau lurralde horietako edozein aireratze izan daitezke.
Mattin Iñiguez txapeldun
Sailkapen orokorrean, Mattin Iñiguez zegamarra (Gipuzkoa) izan da garaile nagusia. Iñiguezek 2025eko Red Bull X-Alps lehiaketa gogorrean parte hartu du aurten, eta, kontatu duenez, «lehiaketa horretarako entrenamendu gogorren emaitza izan da, beste hamaika hegaldiren artean, Aizkorri mendigunearen iparraldean egindako hegaldi ikusgarri bezain gogoangarria».
Bigarren Iñigo Gabiria elorriarra (Bizkaia) izan da, eta hirugarren, berriz, Aner Etxezabal azpeitiarra (Gipuzkoa). Hiruren artean 700 ordutik gora pasatu dituzte hegan aurten, horien erdiak Iñiguezek.
Bertaratuek pilotu sarituen ahotik entzun ahal izan zituzten urteko bizipen eta pasarterik onenak. Gabiriak «izurik ez baina momentu izugarriak» bizi izan dituela aitortu zuen. Etxezabalek, berriz, Endoiatik aireratu eta Hernio eta Pagoeta mendietan barrena egindako hegaldiaren zailtasunak azaldu zituen, eta Iñiguezekin batera X-Alps proba prestatzen «elurretan izandako aireratze konplikatuen» berri ere eman zuen.
Euskadiko Aire Kirol Federazioak antolatutako sari banaketan, hauek izan dira gainontzeko kategorietako irabazleak: Klubik onena: BAIZA kluba. Tandem edo bi plazako hegaldirik onena: Ander Lasa, Nerea bikotekidearekin. Klub kategoria: Zigor Diaz. Eta Sport kategoria, azkenik: Iñigo Gabiria.
Ekitaldia amaitzeko, mokadutxo bat eskaini zuten antolatzaileek, eta, solasaldi lasaian, pilotuak eta zaleak hegaldien trikimailuez eta momenturik gogoangarrienez aritu ziren.
Informazio gehigarria eta esker ona
Antolatzaileek Orioko Udalari eta bertako Orioko Turismo Sailari eskerrik beroena adierazi nahi izan diete ekitaldia antolatzeko eskainitako laguntza eta erraztasun guztiengatik. Emaitzen zerrenda osoak, sailkapen guztiak, argazkiak eta abar lotura honetan daude eskuragarri.
