Uztailaren 13an Katalunian entrenatzen ari zela behi batek eraso egin ondoren, bazirudien Sara Alonsoren denboraldia hantxe amaituko zela, baina korrikalari donostiarra uste baino lehenago osatu eta itzuli da, indartsu itzuli ere. Gaur, bosgarren izan da Chamonixeko UTMB proba entzutetsuaren barnean egiten den OCC lasterketan (61 km, 3.400 m+).
Bi helburu nagusi zituen Alonsok Orsieres-Champex-Chamonix (OCC) proban: iazko laugarren postua hobetzea —hau da, podiumean egotea, zenbat eta gorago hobe— eta sei ordutik jaistea. Bigarren helburua, bai, bete du, 5 ordu, 50 minutu eta 26 segundo behar izan ditu proba osatzeko, baina lehena ez.
Hasi, indartsu hasi da Alonso, faborito nagusien taldean, Miao Yao txinatarrarekin, Joyline Chepnegeno kenyarrarekin eta Judith Wyder suitzarrarekin batera. Martignyko igarobiderako (22 km), ordea, argi ikusi da Yao txinatarra eta Chepnegeno kenyarra biziago zihoazela. Orain bat, orain bestea, aurretik ibili dira biak lasterketa gehienean, eta, azkenik, Chepnegeno gailendu da (05.34.03). Yao txinatarra izan da bigarren, minutu eskasera (05.35.13); Wyder, hirugarren (05.38.22); Maude Mathys suitzarra, laugarren (05.45.43); eta Alonso, bosgarren.
Alonsoren helburua, orain, Munduko Txapelketa izango da, irailaren 25etik 28ra jokatuko dena, eta, ondoren, Golden Trail World Serieseko finala, urriaren 9tik 12ra izango dena. Gaur egun, bigarren da Alonso GTWSeko sailkapen nagusi horretan.
Sarah Ugarte donostiarra ere lehiatu da OCC proban eta 64. izan da (07.42.31)
Gizonezkoetan, Jim Walmsley estatubatuarra gailendu da (05.00.35). Proba gehienean oso aurretik ibili da Walmsley, baina amaieran oso estu hartu du Cristian Minoggio italiarrak (05.00.55). Hirugarren Andrzej Witek poloniarra izan da (05.04.08).
Aritz Egea ere lehiatu da OCC proban, baina urretxuarra erretiratu egin da lau orduren buruan.
Bihar, Goar Lopetegi ibartarra (Gipuzkoa) CCC lasterketan lehiatuko da (100 km, 6.000 m+); Cormayeur eta Chamonix artean egiten da UTMBren barneko proba hori. Maite Maiora mendaroarra eta Javi Dominguez gasteiztarra, berriz, ohiko UTMB klasikoan lehiatuko dira beste behin (174 km, 10.000 m+), Chamonix eta Les Houches artean.
Sailkapenak eta estatistikak, UMBren webgunean.
