Agrigentoko epaile Stefano Zammutok eman du Open Arms aske uzteko agindua. Itsasontzia eskualdeko fiskaltzaren eskariz bahitu zuen justiziak abuztuaren 21ean, Luigi Patronaggio fiskala bera ontzira igo eta barruan zeuden migratzaileen egoera zer-nolakoa zen ikusi ostean.
Bahimendua agindu zutenerako, 83 migratzaileek bi aste zeramatzaten itsasontzian, Italiako agintariek porturatzeko baimena emateko zain. Barne ministro Matteo Salviniren jarrera, ordea, aurrekoetan bezalakoa izan zen; alegia, porturatzeko baimena ukatu zien Open Arms-eko arduradunei, eta Salvinik adierazi zuen "ardura osoa" bere gain hartzen zuela fiskaltzak har zitzakeen neurrien aurrean.
Zammutok, bahimendua bertan behera utzi, eta ontzia gobernuz kanpoko erakundeari itzultzeko agindu du, baina berretsi egin du duela bi aste fiskalak hartutako erabakia. Hark Italiako administrazioaren jokabidea ikertzeko argudioarekin agindu zuen ontzia bahitzeko; orain, ordea, epaileak ebatzi du ez dagoela bahimendua luzatzeko arrazoirik, ez dagoelako "froga-eskakizunik".
