Espainiako Estatistika Institutuak (INE) gaur jakinarazi duenez, 5.553.983 katalan daude abenduaren 21ean botoa ematera deituta. Horietatik 5.329.139 Katalunian bizi diren herritarrak dira, eta 224.844 atzerrian bizi direnak. Urriaren 1eko galdeketan botoa ematera deitu zituztenak baino 210.625 gehiago dira.
2015eko eta 2012ko hauteskundeekin alderatuta, nabarmena da erroldaren handitzea. 2015ean baino 43.130 herritar gehiagok eman ahal izango dute botoa, eta 2012an baino 296.731 gehiagok.
INEk ez du zehaztu botoa ematera deituta daudenetatik zenbat bizi diren Espainian edo Euskal Herrian. Zehaztu du, ordea, Frantzian bizi direla 29.344, Argentinan 25.700, Alemanian 15.321, AEBetan 14.460, Méxikon 14.189, Andorran 13.102, Erresuma Batuan 12.550, Suitzan 11.617 eta Brasilen 10.499.
