Astelehenean ehun migratzaile inguru zeramatzan ontzi bat aurkitu zuten Cabo Verden; uztailaren 10ean atera zen Senegaldik, Kanaria uharteetara heltzeko helburuarekin. 38 pertsona salbatu dituzte —denak senegaldarrak, Ginea Bissauko bat izan ezik—. Zazpi gorpu aurkitu dituzte, eta gainontzekoak –topatu ez dituzten 56 lagunak– hiltzat jo dituzte autoritateek eta IOM Nazioarteko Migrazio Erakundeak. «Ontzi bat hondoratzean jendea galtzen bada, hiltzat jotzen ditugu normalean», adierazi du IOMko bozeramaile Safa Msehlik.
IOMk adierazi du ez dakitela zer pasatu zen ontziarekin. Msehlik esan duenez, nahiz eta ezer ez gertatu, itsasoan denbora luzez galduta gelditzeak ere arriskuak ditu, «hipotermia eta deshidratazioa», esaterako.
Astelehenean, arrantzale batzuek Cabo Verdeko Sal irlatik 320 kilometrora aurkitu zuten ontzia, eta herrialde hartako autoritateei abisua eman. Osasun zerbitzuen arabera, salbatu zituzten lagunetatik zazpi ospitalera eraman behar izan zituzten. Gainontzekoak eskola batera eraman zituzten, eta laguntza jasotzen ari dira.
Ontzian zirenen senide batzuek ohartarazi zuten uztailaren 20an galdu zutela haien arrastoa, hamar egun baitzeramaten berririk gabe. Hala azaldu du Helena Maleno Caminando Fronteras gobernuz kanpoko erakundeko arduradunak. Migratzaileak irten ziren Fass Boye herriko arrantzaleen elkarteko lehendakaria da senideetako bat, eta san du bere bi iloba desagertu direla: «haiek Espainiara iritsi nahi zuten».
Afrika mendebaldetik ateratzen direnek eta Kanariak helmuga dituztenek geldialdia egin ohi dute Cabo Verden, gero handik Kanarietara joateko zuzenean. Bidaia oso arriskutsua da. Urtarrilean, 90 migratzaile salbatu zituzten Cabo Verdeko erreskate zerbitzuek atzemandako itsasontzi batetik: Senegalgoak, Gambiakoak, Ginea Bissaukoak eta Sierra Leonakoak ziren. Bi hildako zeuden ontzian. IOMren kalkuluen arabera, 140 migratzaile hil dira itsasbide horretan. 2014. urtetik, 650 hildako erregistratu dira, baina gobernuz kanpoko erakundeak uste du gehiago direla.
