Bost orduko eztabaidaren ondoren, AEBetako Ordezkarien Ganberak aldeko 244 botorekin eta kontrako 185ekin Barack Obama presidentearen 2010eko osasun erreformaren aurkako neurria onartu zuen atzo gauean. Horrek ez du askorako balio izango, Epaitegi Gorenak orain bi aste erreforma konstituzionala dela ebatzi zuelako eta Senatuan demokratek gehiengoa dutelako, Ordezkarien Ganbaran ez bezala.
Errepublikarrak, ordea, boto-emaile kontsebadoreak mugitu arazi nahi dituzte azaroko hauteskundeei begira, eta bozketak baliorik izango ez duen arren, modu horretan herritarren artean eurekiko atxikimendua lortu nahi dute. Ez da, gainera, osasun erreformaren aurka bozkatzen duten lehen aldia. Etxe Zuriak, baina, garbi utzi du soilik bi ganberek kontra bozkatzen badute utziko duela bertan behera osasun erreforma.
Erreformak osasun zerbitzua hobetu eta gastuak murrizteko asmoa du. Gainera, asegurua beharrezkoa egiten du eta aseguru etxeak euren zerbitzua zabaltzera behartzen ditu. Errepublikarrentzat herritarrak aseguru hori izatera behartzea beste zerga bat ordainaraztea da. Mitt Romney presidentetzarako hautagai errepublikarrak esan du presidente ateratzen bada, bertan behera utziko duela osasun erreforma.
