Mosku eta Pekin elkarrengandik urrun daude geografikoki, 6.000 kilometro ingurura, baina mugakide dira Errusia eta Txina, eta zera erakutsi dute gaur Vladimir Putin eta Xi Jinping presidenteek, mugakide izateaz gain, adiskide eta aliatuak ere badirela bi potentziok. Dagoeneko gordeak dituzte Donald Trump Ameriketako Estatu Batuetako presidentearen bisitaren harira joan den astean altxatu zituzten bandera marradun eta izardunak, eta Errusiako banderekin apaindu dute Pekingo Tiananmen plaza; Xik hortxe egin dio harrera bere lagunari, Herriaren Areto Handiaren atariko eskaileretan. Bi herrialdeen arteko lankidetza sendotu dute hainbat akordio sinatuta, nazioarteko harremanez mintzatu dira, eta energia sektorea ere izan da bilerako ardatzetako bat.
Txina baita Errusiari petrolio gordin gehien erosten dion herrialdea, haren esportazioen erdiak gutxi gorabehera; gas naturala, gas natural likidotua eta ikatza ere badira aintzat hartu beharreko lehengaiak. «Noski, prest gaude erregai horien guztien etenik gabeko hornidura modu fidagarrian eta egonkorrean bermatzeko Txinako merkatuari, zeina geroz eta azkarrago ari den hazten», esan du Putinek. Are, Kremlinek ohar batean iragarri du bi presidenteak bat etorri direla energia sektoreari dagokion «itun garrantzitsu» bati buruz, baina ez du horri buruzko xehetasunik eman.
Errusiatik heltzen zaion energiaz aparte, Txinak Persiar golkotik, Ormuzko itsasartetik inportatzen ditu petrolio gordinaren %40 eta gas naturalaren %30, nahiz eta Iranek eta AEBek norbere kasa ezarritako blokeoek kolokan jarri duten lehengai horien hornidura. Nazioarteko gatazkak hizpide, Xik ohartarazi du «kinka larrian» dagoela Ekialde Hurbila, eta bere iritziz «onartezina» izango litzateke gerra are gehiago gogortzea, hain justu kontrakoak ahalbidetuko lukeelako energia hornidura eta nazioarteko merkataritza «egonkortzen» laguntzea: «Betebeharra da etsaikeria guztiak etetea».
Putinek nabarmendu du «nazioarteko ordena justu bat» garatu behar dutela Moskuk eta Pekinek, irizten baitio «berebiziko» zeresana dutela. Ez du inolako gatazkarik zuzenean aipatu, baina bai esan duela badirela munduko koiunturari eragiten dioten «zenbait faktore kaltegarri». Anfitrioiak ere deitoratu du agerikoa dela «alde bakarreko hegemoniarako joera», eta erantsi du, bi herrialdeak Nazio Batuen Erakundeko Segurtasun Kontseiluko kide iraunkorrak eta potentzia «handiak» direnez gero, bien arteko lankidetza estrategikoari «epe luzera» erreparatu behar diotela «munduko gobernantza zentzuzkoago bat» lortzeko, Txinako Xinhua agentziak kaleratu duenez.
«Kolonialismoaren izpiritua»
Adierazpen bateratu bat ere kaleratu dute Putinek eta Xik; keinu hori bada bi herrialdeen arteko harreman estuaren erakusle —joan den astean, Trumpek eta Xik ez zuten halakorik sinatu—. Horretan, ohartarazi dute «geroz eta konplexuagoa» dela munduko egoera, eta badela arriskua «oihaneko araua» gailentzeko. Hori bai: «Porrot egin dute, kolonialismo garaiko izpirituak bultzatuta, hainbat estatuk nazioarteko auziak beren kabuz kudeatzeko saiakerek, baita mundu osoari beren interesak inposatzeko eta beste herrialde batzuen garapen subiranoa mugatzeko ahaleginek ere».
Bestalde, Txinako presidenteak adierazi du konfiantza dela bi potentzien arteko hartu-emanaren ezaugarririk «bereizgarriena». Horren harira, luzatu egin dute Pekinen eta Moskuren arteko Auzokidetza Onaren, Adiskidetasunaren eta Elkarlanaren Ituna; 25 urte beteko ditu aurten. Xiren esanetan, dokumentu hori izan da «adiskidetasun iraunkorra eta koordinazio estrategikoa lortzeko oinarria». Errusiako presidenteak berak eta Jiang Zemin orduko hartako Txinakoak sinatu zuten, 2001ean, merkataritza harremanak indartzeko eta multipolartasuna bultzatzeko asmoz.
