Alex Badeh Nigeriako militarren ordezkariak esan duenez, su-etena adostu dute Boko Haramekin, eta akordio horren barruan dago neskatilak aske uztea, BBCk jaso duenez. Armadak agindua die militarrei ituna betetzeko.
Boko Haram neskak libre uzteko prest agertu izan da, presoen truke. Apirilaren 14an bahitu zituen neskak Chiboken (Borno, Nigeria ipar-ekialdea), eskola bateko barnetegitik —15 eta 18 urte bitartean dituzte—. Haietarik 53k ihes egitea lortu zuten gero. Nigeriako Borno estatuan jarduten du nagusiki matxino talde islamistak.
