Tiroketa bat gertatu zen atzo Kalifornia hegoaldeko (AEB Ameriketako Estatu Batuak) meskita nagusian, San Diego hirian, eta bortz lagun hil ziren orotara. Tiroketa egin zuten bi erasotzaileak ziren hildako horietako bi, eta, Scott Wahl San Diegoko poliziaburuak jakinarazi duenez, beren buruaz bertze egin zuten erasoaldiaren ondotik. Nerabeak ziren biak, eta gorroto delitu gisa ari dira ikertzen tiroketa.
The New York Times egunkariak esplikatu du ikertzaileek «idatzi islamofoboak» aurkitu dituztela erasotzaileen ibilgailuan; are, «gorroto mezuak» zeudela arman idatzita. Polizia iritsi zenerako, hiru pertsona zeuden hilda, horietako bat meskitako bizkartzaina, eta geroxeago aurkitu zituzten erasotzaileen gorpuak, ibilgailuan bertan.
Meskita bat izateaz gain, eskola bat ere bada San Diegoko zentro islamikoa, eta zuzendaria «minduta, haserre, eta triste» agertu da erasoaren biharamunean. Atzokoa AEBetako erakunde erlijiosoen kontra egindako bertze erasoaldi bat izan da, eta Wahl poliziaburuak azaldu du «segurtasun neurriak indartu» eginen dituztela halako zentroen kanpoaldean.
