Kanada Europako Batasunaren «lehen kide elkartua» izateko asmoa iragarri zuen atzo Europako Batzordeko presidente Ursula von der Leyenek. Mark Carney Kanadako lehen ministroak esan izan du Kanadak «segurtasun eta ekonomia aliantza parekorik gabea» egin nahi duela Europarekin, eta hori arrazoitu du gaur, Europako Parlamentuko ordezkarien aurrean, Estrasburgon (Frantzia). Haren esanetan, Europa eta Kanada indartsuak dira nor bere aldetik, baina «indartsuagoak dira elkarrekin badaude». Horrela, nabarmendu du koalizio horrek hartzen duen izena hartzen duela ere, «itsasargi bat» izango dela «beste demokrazia batzuentzat».
Carneyk azpimarratu du Europak eta Kanadak balioak partekatzen dituztela, eta esan du Kanadak «pozarren» hartu duela Europako Batasunaren lehen kide elkartua izateko proposamena. Nazioarteko ordena ezbaian dagoen honetan, Carneyk defendatu du «lankidetza sakonago bat» sortzeak «berebiziko garrantzia» daukala, eta nabarmendu du aliantza horrek «ikuspegi positiboa» izango duela; «parekorik gabea».
Airean dago oraindik aliantza horrek zer itxura har dezakeen. Izan ere, kategoria hori ez dago Europako tratatuetan estatus juridiko moduan. Hortaz, Europako Batasunak zehaztu beharko du «kide elkartu» izateak zein abantaila ematen dizkion Kanadari.
Espero zitekeen moduan, ordea, Donald Trump AEBetako presidenteak ez du begi onez ikusi mugimendua. Aliantza horren gaineko xehetasunen berri eduki gabe, gaur goizaldean kazetarien aurrean adierazi du Kanada Europaren aldamenera hurbildu nahi izatea AEBen «kalterako ekintzatzat» har daitekeela, eta, ohi duen bezala, muga zergak ezartzearekin egin du mehatxu. «Kanada bazkide komertzial txarra izan da. Gure aurkako ekintza dela uste badut, oso muga zerga gogorrak ezarriko ditut, edo Europarekiko merkataritza moztuko dut arlo askotan».
Trumpek hitz egin eta ordu batzuk beranduago igo da Europako Parlamentuko atrilera Carney, eta erantzun egin dio, zeharka bada ere. «Gure gizartea ez dago ekaitz berrietatik salbu» esan du, eta Trumpen modus operandi-a ekarri du gogora: «merkataritza arma gisa erabiltzea edota muga zergak presioa egiteko erabiltzea». Hori dela eta, Kanadako lehen ministroak eman beharreko urratsak zein diren adierazi du parlamentarien aurrean: «Gure oinarriak finkatu behar ditugu gure balioak defendatzeko, eta gure herritarrek aurrera egin ahal izateko babes sabai bat eraiki behar dugu».
Hala ere, Carneyk ohartarazi du Europaren eta Kanadaren aliantzaren helburua ez dela «botere gehiago» lortzea gainerakoak «menderatzeko edo kontrolatzeko», baizik eta «erresilientzia»: «Inork ezin dezan gure merkatua kontrolatu, gure subiranotasuna ahuldu, gure lurralde osotasuna mehatxatu edo gure askatasuna, demokrazia eta zuzenbide estatua zapaldu».
