Espainiako Gobernuak gaur eguneratutako datuen arabera, Ceutako migrazio krisian 80.000 lagunek igaro zuten Marokoren eta Espainiaren arteko muga —142 hil ziren horretarako ahaleginean ari zirela, eta beste hainbat desagertuta daude oraindik—. Gehienek etxerako bidea hartu dute jada, eta Marokora itzuli dira. Ceutako Poliziaren azken datuen arabera, azkeneko 48 orduetan seiehun migratzailek baino gehiagok hartu dute berriro Marokorako bidea, baina 8.000 lagun inguru Ceutan daude oraindik, nola edo hala bizirik irauten. Bada, Espainiako Gobernuak jakinarazi du migratzaile horietatik soilik 5.000 har ditzakeela Espainiak. Alegia, gutxienez 3.000 kanporatu egingo dituela.
Madrilen ustetan, Ceutan gelditzen diren migratzaileetatik 2.500 adingabeak dira —laurehun lagunek 13 urte ere ez dauzkate—, eta, horiek ez ezik, beste 2.500 lagunek ere eskatu ahal izango dute asiloa. Izatez, Espainia behartuta dago kasu guztiak banaka-banaka aztertzera.
Espainiako Atzerri ministro Jose Manuel Albaresek herenegun ohartarazi zuen Espainian «modu irregularrean» sartu diren migratzaile guztiak «itzularazi» egingo dituztela. Baina, Espainiako legediaren arabera, galarazita dago inoren kargura ez dauden atzerriko adingabeak deportatzea, eta Espainiako Gobernua horregatik dago behartuta duela bi aste Ceutara iritsi ziren adingabeak hartzera. Egia da baldin eta adingabeek etxera itzuli nahi badute etxera bidaliko dituztela, baita gurasoek etxeratzeko eskatzen badute ere. Baina, hala ere, oso gutxitan gertatzen da halakorik.
Espainiako Barne ministro Fernando Grande-Marlaskak atzo esan zuenaren arabera, dagoeneko abian dituzte nazioarteko babesa eskuratzeko laurehun espediente inguru —erregistro bat da, finean, atzerritar batek herrialde batean babesa eskatzen duenean egin beharrekoa—. Eta zehaztu espediente horiek onestea beharrezkoa izango dela asiloa eskuratu ahal izateko. Alegia, asiloa eskatzeko aukerarik gabe geldituko diren 3.000 lagunak, eta espedientea onesten ez dietenak kanporatu egingo ditu Espainiak.
Era berean, Espainiako legediaren arabera, babes hartzeko eskubidea izango dute, besteak beste, jazarpena edo biolentzia «larria» jasaten dutenek, eta gatazka armatuak dauden herrialdeetatik doazenek.
Bilera dute gaur
Adingabeei dagokienez, gaur bilduko dira Espainiako Gobernuko ordezkariak eta Espainiako autonomia erkidegoetakoak 2.500 gazte horien auziari heltzeko —lehen harremana egiteko modua izango da, eta ez da politikaririk egongo; profil teknikoagoko kideak baizik—. Asmoa da Ceutara 25 milioi euroko «premiazko diru laguntza bat» bidaltzea, «egoera arintzeko».
VOX-EK ESKATU DU MAROKOK ORDAINDU DITZALA MIGRAZIO KRISIAK ERAGINDAKO «GAINKOSTUAK»
Vox Espainiako alderdi ultrak Espainiako Gobernuari eskatu dio egin dezala duela bi aste Ceutako migrazio krisiak «Espainian sortu zituen gainkostuen auditoretza zorrotza», eta gero Marokori ordainaraz diezazkiola «gainkostu» horiek. Alderdi ultrak legez besteko bi proposamen egin ditu gaur Espainiako Kongresuan, uste baitu Espainiak ez dituela bere gain hartu behar «halako egoera batek eragiten dituen ondorio ekonomikoak». Izan ere, alderdiak gaur adierazi du krisiak «Marokoren presio masiboa» daukala oinarrian, besteak beste.
Hala ere, hautsak harrotu ditu bilkurak. Izan ere, PPk Vox alderdi ultraren babesarekin gobernatzen dituen hiru erkidegoetako ordezkariek ez dute parte hartuko; alegia, Aragoiko, Extremadurako eta Gaztela eta Leongo ordezkariek —Voxeko lider Santiago Abascalek, esaterako, esan izan du espainiarren euro bakar batek ere ez duela «bakarrik dauden migrante adingabeen, mafien edo inbaditzaileen eskuetan» amaituko—. PPk bakarrik agintzen duen erkidegoetako kideak, aldiz, bileran izango dira.
Bilera orokorra hilaren bukaera aldera egingo dute, erabakitzeko gazte horiek nola banatu Espainiako autonomia erkidego guztietan. Baita Espainiako Gobernuarekin harremanetan jarri diren sendien artean ere—izan ere, familia batzuk prest agertu dira gazte horiek zaintzeko—. Gaurko bileran ez bezala, Sira Rego Espainiako Gazteen eta Haurren Gaietarako ministroak eta autonomia erkidegoetako kontseilariek parte hartuko dute egun horretakoan.
