Kolonbiako Hiri Nagusien Elkarteak gaur goizaldean zabaldu duen datuaren arabera, gutxienez 132 lagun hil ziren atzo Kolonbian izandako lurrikaran —zifra horrek ez ditu kontuan hartzen hiri handien inguruan dauden herriak, eta kontuan hartu behar da bertan ere hainbat eraikin erori direla—. Herrialdearen mendebaldean dagoen Choco departamentuan izan zuen jatorria hondamendiak, San Jose del Palmar herrian, Bogota hiriburutik 400 kilometrora, baina inguruetan ere kalte handiak eragin zituen.
Richter eskalako 7,4 gradukoa izan zen lurrikara —Venezuela astindu zuten bi lurrikarak antzekoak izan ziren; 7,2koa eta 7,5ekoa—, eta hogeitik gora erreplika zenbatu zituzten. Pereira, Cali, Quibdo, Manizales eta Armenia dira kalte gehien jasan dituzten hiriak, eta alerta gorrian daude orain. Guztira, gutxienez 86 eraikin erori dira eremu horietan, eta armadako 180 erreskatista hedatu dira bertan, hondakinen artean harrapatuta dauden herritarrak ateratzeko.
Calin, esaterako, herrialdeko hiri handietan hirugarrenean, etxeratze agindua ezarri zuen hiriko alkate Alejandro Ederrek atzo arratsaldeko 20:00etatik gaur goizeko 06:00ak arte; eta egoeraren «larritasuna» argudiatuta, militarrek hiria hartu dute. Alkateak azaldu zuenez, neurriaren helburua da erreskate zerbitzuetako langileen «mugikortasuna eta segurtasuna bermatzea» eta hondakinen artean harrapatuta egon daitezkeen «pertsonak bilatzeko eta erreskatatzeko ahaleginak egin ditzaten ahalbidetzea».
🇨🇴 The moment the Cathedral Basilica of Our Lady of the Rosary in Manizales, Colombia, partially collapsed during the powerful 7.4-magnitude earthquake. pic.twitter.com/BzqUSPq1GT
— Visegrád 24 (@visegrad24) August 10, 2026
Abelardo De la Espriella Kolonbiako presidente izendatu berriak lehen krisi larria du. Atzo nazioari mintzatu zitzaion diskurtso bat emanez, eta, besteak beste, esan zuen Kolonbiako Gobernuak «bere esku dauzkan baliabide guztiak» erabiliko dituela «kaltetutako komunitateei laguntzeko eta behar den lekuan laguntza emateko». Beranduago, gaur goizaldean adierazi duenez, 35 lagun hil dira Kali hirian; 700 pertsona zauritu dira, eta beste hemezortzi lagunen bila ari direla ere esan du. Gainera, azaldu du 5.000 etxebizitza eta hiru ospitale kolapsatuta daudela, eta beste hemezortzi ospitalek kalte nabarmenak dauzkatela. «Aurreneko 48 orduek berebiziko garrantzia daukate eroritako eraikinen hondakinen artean harrapatuta dauden pertsonak bizirik erreskatatzeko», gaineratu du.
Hiri horretako ospitaleak, gainera, alerta gorrian daude. Hala adierazi du German Escobar hiriko osasun idazkariak. Izan ere, azaldu du ospitale horiek 456 lagun zauritu artatu dituztela, eta beren edukieraren 100%ean daude. Escobarren arabera, lau erietxe handi «guztiz ebakuatu» behar izan dituzte, eta karpak prestatu dituzte inguruko belardietan zaurituak artatu ahal izateko.
Powerful 7.4-magnitude earthquake hits Manizales, Colombia 🇨🇴 (10.08.2026)pic.twitter.com/pmcAFyWQbp
— Disaster News (@Top_Disaster) August 10, 2026
Lurrikara txikiak ohikoak izaten dira Kolonbian —temblor deitzen diote bertan, dardara, euskaraz—. Baina gutxitan gertatu dira Richter eskalan 6.0 gradu baino gehiagoko lurrikarak. Aipagarrienetako bat 1999an gertatu zen, Armenia hiriaren inguruan —6,1 gradukoa izan zen Richter eskalan—. 1.185 lagun hil ziren hondamendi hartan, 8.500etik gora zauritu ziren, eta ia 36.000 etxebizitza suntsitu zituen lurrikarak.
