Bi lurrikara gogorrek Venezuela astindu eta hilabete eta erdi eskasera, hondamendia gertatu da Kolonbian ere, eta gutxienez 74 lagun hil dira herrialdearen mendebaldean: Pereira hiriko alkateak La FM irrati katean adierazi du gutxienez berrogei hil direla; Caucako Harana departamentuko gobernuak jakinarazi du 27 hil direla bertan; Choco departamentukoak, berriz, lau hildakoren berri eman du; gutxienez beste hiru lagun ere hil dira Manizalesen, hango alkateak Blu Radio irrati katean esan duenez; eta Buenaventurako alkateak beste hildako baten berri eman du.
07:34an jazo da lurrikara —12:34 Euskal Herrian—, eta Richter eskalako 7,4 gradukoa izan da; Kolonbia mendebaldeko Choco departamentuan izan du jatorria, San Jose del Palmar herrian, hain zuzen. Departamentu horretako hiriburuan, Quibdon, dozenaka eraikin erori dira, eta hainbat lagun zauritu. Horrez gain, aldameneko departamentuetan ere kalteak eragin ditu astinaldiak. Cali hiriko alkateak ohartarazi du gutxienez hogei bat eraikin erori direla, eta jendea «harrapatuta» dagoela hondakinen artean. Sare sozialetan idatzi duen mezu batean, jakinarazi du laguntza eskatu diela Bogotari eta Medellini, erreskate zerbitzuak bidal ditzaten.
Abelardo de la Espriella Kolonbiako presidenteak ostiralean egin zuen hiri horretan inbestidura saioa, eta larrialdi batzorde batera deitu du lurrikarak eragindako kalteak-eta aztertzeko. «Ez daude bakarrik. Estatua bertan dago, eta beharrean ari da», idatzi du sare sozialetan idatzi duen mezu batean.
Bestalde, lurrikarak kalteak eragin ditu gutxienez zazpi aireportutan, Cali Pereira, Manizales, Quibdo, Armenia, Cartago eta Buenaventura hirikoetan, hain zuzen. Hegaldiak bertan behera utziko dituzte azpiegiturak aztertu arte, Kolonbiako aireportuak kudeatzen dituen Aerocivil erakundeak ohar bidez jakinarazi duenez.
Ekuadorrek eta El Salvadorrek adierazi dute erreskate zerbitzuak bidaltzeko prest daudela: Daniel Noboa Ekuadorko presidenteak «elkartasuna» adierazi dio Kolonbiari sare sozialetan, eta erreskate zerbitzuetako 47 kide hara joateko prest daudela nabarmendu du, astebetez aritu daitezen; halaber, Nayib Bukele El Salvadorko presidenteak sare sozialetan idatzi du «berehala» laguntzeko pronto daudela, «behar dutena behar dutela».
