EB Europako Batasunak migrazioaren aurkako neurriak indartzen segitzen du. Gaur, Europako Parlamentuak «itzulketen araudia» onartu du. Aurrera jarraitzen badu, EBko estatuei baimenduko die migranteak deportatzea talde komunitarioko kide ez diren herrialdeetara, hau da, hirugarren herrialdeetako deportazio zentroetara. Orain, Europar Kontseiluan, EBko estatu kideek eztabaidatuko dute araudia.
Europako Parlamentuko diputatu kontserbadoreen eta ultraeskuindarren botoekin egin du aurrera proposamenak. 389 eurodiputatuk bozkatu dute alde; 206k, kontra; eta 32 abstenitu egin dira.
Araudiak aurrera jarraitzen badu, EBko estatuek akordioak egin ahal izango dituzte talde komunitariotik kanpoko herrialdeekin, eta horietara deportatu ahal izango dituzte asilo eskatzaileak. Giorgia Meloni Italiako lehen ministroaren gobernuak abiarazitako eredua du oinarri legedi horrek. Italiak 2024an deportazio zentro batzuk eraiki zituen Albanian; gaur-gaurkoz, ez daude martxan, zenbait auzitegik atzera bota baitituzte Italiak emandako deportazio aginduak.
Sozialdemokratek, liberalek, berdeek eta Europako Ezker Unitarioak legediaren aurka bozkatu dute, eta salatu giza eskubideen aurka egiten duela. Iritzi berekoak dira hainbat GKE.
