X-k Parisen duen egoitza miatu dute gaur goizean, eta, horren ondoren, Frantziako Fiskaltzak adierazi du Elon Musk sare sozial horren jabea deklaratzera deitu duela. Apirilaren 20an deklaratuko du.
Fiskaltzak ohar batean zehaztu duenez, iazko urtarrilaren 12an eta uztailaren 9an X-ren aurka jarritako bi salaketari erantzunez miatu dute egoitza. Ministerio Publikoak dioenez, salaketa horiek zioten X sare sozialaren Grok adimen artifizialaren eraginez X-k «eduki negazionistak eta kutsu sexualeko deepfake-ak hedatzen» dituela.
Parisko Fiskaltzaren ziberdelinkuentziaren aurkako atalak eta Frantziako Poliziako eta Europoleko agenteek ere parte hartu dute miaketan, komunikatuak dioenez. Fiskaltzak gehitu du, bide batez, aurrerantzean ez duela sare sozial hori baliatuko bere jardueren berri emateko.
Emmanuel Macron Frantziako presidentearen alderdiko diputatu Eric Bothorelek jarri zuen lehen salaketa, argudiatuz plataformaren funtzionatzeko moduak datuak automatikoki prozesatzeko era distortsionatu zuela, beharbada.
Ikertzen ari diren delituen artean, fiskaltzak hauek aipatu ditu, besteak beste: «konplizitatea joera pedo-pornografikoko irudiak edukitzeko orduan», «pertsona irudikatzeko moduaren aurkako atentatua», eta «datuak automatikoki erabiltzeko sistematik datuak legez kanpo erabiltzea, talde antolatu baten bidez».
