Erresuma Batuaren eta EBren arteko harremana «berrabiarazteko» akordio bat egin dute

EBko 100.000 gaztek Erresuma Batuan lan egiteko edo ikasteko aukera izango dute, eta janarien eta edarien esportazioa eta inportazioa erraztuko dute. Beste eremu batzuetan negoziatzen jarraituko dute.

Ursula von der Leyen, Andy Burnham eta Antonio Costa gaur, Bruselan, bi aldeen arteko goi bileran. OLIVIER HOSLET / EFE
Ursula von der Leyen, Andy Burnham eta Antonio Costa gaur, Bruselan, bi aldeen arteko goi bileran. OLIVIER HOSLET / EFE
Beñat Mujika Telleria.
2026ko azaroaren 20a
12:22
Entzun 00:00:00 00:00:00

Erresuma Batuko lehen ministro Andy Burnhamek Europako Batasunera gerturatzeko urratsak egin ditu azken hilabeteetan. Brexit-ak funtzionatu ez duela iritzita, EBrekin akordio berri bat egiteko prest dago Burnham. Gaur bildu da EBko ordezkariekin, Bruselan, eta Downing Streetek esan duenez, bi aldeen arteko harremana «berrabiaraztea» adostu dute. Besteak beste, elikagaien eta edarien merkataritza errazteko akordio bat egin dute, eta eskema berri bat ere adostu dute gazteen mugikortasunari dagokionez. «Amaitu dira negoziazioak. Akordioa eginda dago», adierazi du Erresuma Batuak goi bilera abiatu eta ordubete eskasera.

EB eta Erresuma Batuaren arteko goi bilerak hainbat hari mutur zituen. Horietako batzuei gaur tira egitekoak ziren, neurri xumeagoak direnei. Eta, horrela, Erresuma Batuko herritarrek EBtik irtetearen alde bozkatu zutenetik hamar urtera, bi aldeek lehen urratsa eman dute haien arteko harremanaren normalizazioan aurrera egiteko.

Garrantzia handiagoko gaiak aurrerago landuko dituzte, tartean zer nolako harremana izango duten Londresek eta Bruselak etorkizunean. Burnhamek argi eta garbi esan izan du brexit-ak Erresuma Batuari kalte egin izan diola eta ez du baztertu urte batzuk barru EBra itzultzeko aukera; alderdi laboristan, ordea, adostasunik ez dago horren inguruan.

Gaur hitzartutako neurrien artean dago gazteen mugikortasuna erraztea. Horrela, EBko 31 urte baino gutxiagoko 100.000 gazte inguruk Erresuma Batura lanera edo ikastera joateko aukera izango dute, eta aukera hori bera izango dute gazte britainiarrek EBn. Denboraldi baterako bisa batekin egingo lukete, baina oraindik ez dago argi bisa horrek zenbat denbora iraungo lukeen. Era berean, sei hilabete eman dizkiote elkarri matrikula tasak zenbatekoak izango diren erabakitzeko. Izan ere, Bruselak eskatu du EBko gazteek britainiarrek ordaintzen dituzten tasak ordaintzeko, baina Londresek artean ez du halakorik onartu.  

Burnhamen kritikak brexit-ari

Keir Starmer aurreko lehen ministroa 2025eko maiatzean bildu zen talde komunitarioko buruekin, testuinguru horretan bertan. Gaur egin dute bigarren bilkura duela ia zazpi urte dibortzioa indarrean sartu zenetik, eta lehenengoa izan da Burnhamentzat, uztailean kargura iritsi ostean. Euskal Herrian 10:30ak zirela bildu dira Burnham bera, Ursula von der Leyen Europako Batzordeko presidentea eta Antonio Costa Europar Kontseiluko presidentea.

Aurrez, baina, Burnhamek mahai inguru bat zuzendu du hainbat enpresatako zuzendarien aurrean. Erresuma Batuak Bruselan daukan enbaxadorearen etxean bildu dira, eta, bertan, defendatu du «zentzua» daukala EBra berriro gerturatzeak. «Lehen ministro gisa, nire helburua zera da; herrialdea bide hobe batetik bideratzea, etorkizunean itxaropen handiagoa izan dezagun eta herrialde osoan aukera gehiago egon daitezen».

Zuzenean mintzatu zaie enpresariei. Adierazi die kostuak asko handitu direla brexit-a ezarri zutenetik, eta enpresen hazkundea «ez aurrera eta ez atzera» dagoela. «Enpresen zein kontsumitzaileen mesedetan ari gara lanean», gaineratu du John Healey Ogasun ministroak.

Era berean, Burnhamek bilera horretan azpimarratu du Erresuma Batuko gizartearen gehiengoak EBrekin harreman estuago bat edukitzea defendatzen duela, eta gobernuaren asmoa herritarren nahiarekin «sintonian» dagoela nabarmendu du.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA