Ukrainako gerraren harira, Errusiaren eta AEBen posizioak «ez daude lehen baino urrunago». Hala adierazi du Juri Uxakovek, Errusiako presidente Vladimir Putinen aholkulariak. Urrunago ez, baina ezta hurbilago ere. Bost orduz egon dira batzartuta Kremlineko eta Etxe Zuriko ordezkariak Moskun, eta ez dute akordiorik lortu. AEBek eta Errusiak Ukrainarako ondutako 28 puntuko planari moldaketak egiteko eskatu dute Kievek eta Europako zenbait herrialdek, eta horren berri eman dio Washingtonek Moskuri. Bilukran lurraldetasunaz aritu dira batez ere; izan ere, Errusiarentzat auzi hori konpondu ezean «ez dago soluziorik».
Atzo arratsaldean hasi zuten bilkura, eta gaur goizaldean amaitu dute. Haren ostean eman du prentsaurrekoa Putinen aholkulariak, eta nabarmendu bilera «eraikitzailea» izan dela. Hitz berbera erabili izan dute Volodimir Zelenski Ukrainako presidenteak zein Donald Trump AEBetakoak, Kieven eta Washingtonen arteko iragan asteko bilkuren ostean ere. Baina elkarrizketa horien ostean Marco Rubio AEBetako Estatu idazkariak ohartarazi zuen moduan, Uxakovek ere zehaztu du oraindik «lan asko» dagoela egiteko: «Ez dugu akordiorik lortu, baina AEBen zenbait proposamen nolabait onargarriak dira. Eztabaidatu daitezke. Beste batzuk ez zaizkigu komeni».
Mahai zuri baten inguruan, aurrez aurre eseri ziren Errusiako eta AEBetako ordezkariak. Alde batean, Uxakov, Putin eta Kirill Dmitriev; bestean, Steve Witkoff Etxe Zuriaren mandatari berezia, Jared Kushner Trumpen aholkularia eta itzultzaile bat. Witkoff izan da, Dmitrievekin batera, AEBek eta Errusiak Ukrainarako ondutako 28 puntuko plana diseinatzeaz arduratu dena. Eta Witkoff bera batzartu zen igande honetan eta aurrekoan —Rubiorekin batera— Ukrainako ordezkaritzekin, Miamin (AEB) eta Genevan (Suitza).
Aurrez, Putinek Errusiako hedabideekin hitz egin zuen, eta kritika gogorrak egin zizkien Europako herrialdeei. Horiek Ukrainarako egin dituzten proposamenak «onartezinak» direla ziurtatu zuen, eta gerraren alde egotea leporatu zien: «AEBetako administrazioari Ukrainarako bake akordio bat lortzea galarazten ari da Europa». Eta mehatxu ere egin zien: «Errusiak ez du Europarekin borrokatu nahi. Baina, Europa hasten bada, gu borrokarako prest gaude».
Errusiako presidentearen iritziz, 28 puntuko plana gatazkaren irtenbiderako oinarri bat da. Bertan jasota dago, besteak beste, lurralde osotasunari uko egin beharko diola Kievek, eta Errusiaren esku geratuko dela Donbass. Donetsk eta Luhansk eskualdeek osatzen dute Donbass, eta egun Errusiak okupatua du haren zati handiena. Hain zuzen atzo, Errusiako Defentsa Ministerioak jakinarazi zuen armadak Pokrovsk hiria hartu duela, orain arte Donetsken Ukrainako armadaren gotorleku izan da Pokrovsk.
Horrez gain, planak jasotzen du Kherson eta Zaporizhia eskualdeak armada bakoitzak kontrolatzen duen eremuaren arabera banatuko lituzketela, eta Krimea ere Errusiaren esku geratuko litzateke —okupatua du 2014tik—. Kievek, baina, ez ditu begi onez ikusten puntu horiek. Eta Zelenskik aste honetan bertan aitortu du negoziazioetako auzirik «zailena» lurraldetasuna dela. Gainera, zirriborroan jasota dago Kievek uko egin beharko diola NATO Ipar Atlantikoko Itunaren erakundean sartzeari, eta armada murriztu beharko duela: 900.000 soldadu ingurutik 600.000ra.
Kiev «indartsu» mantentzea
Azken negoziazioen inguruan, «bake prozesua» martxan dagoela azpimarratu du NATOko zuzendari nagusi Mark Ruttek. Aliantzako Atzerri ministroen bilkuraren aurretik egin ditu adierazpen horiek, Bruselan. Eta gehitu du negoziazioek irauten duten bitartean garrantzitsua dela Ukraina «indartsu» mantentzea, Errusiaren aurrean defendatu ahal izateko eta negoziatzerakoan posizio sendo batean egoteko. Rutteren ustez, Moskuri presio egiteko modurik onena da erakustea Kievi militarki laguntza ematen jarraituko dutela, baita zigorrak ezartzea ere.
Bitartean, Zelenski Europako hainbat liderrekin bildu da azken egunetan. Herenegun, Emmanuel Macron Frantziako presidentearekin batzartu zen, Parisen. Eta atzo, berriz, Irlandan izan zen. Micheal Martin lehen ministroarekin hitz egin zuen lehenik, eta Irlandako Parlamentua bisitatu zuen gero.
